{Baby} 睡袋．全部都係睡袋！

如果有最無聊媽媽選舉，我諗我會參加，仲要提名 TareBaby 婆婆一齊參加！


天氣轉涼時，有位無聊媽媽突然發瘟，想整幾個睡袋比 TareBaby 既公仔 (你無睇錯，係整比公仔，而唔係整比 TareBaby)。之前淘左個手提衣車，雖然雞雞地，又要未用已經比我跌爆左個殼，但都成功車到一個睡袋，而 TareBaby 都可以幫忙車一行咁大把。 


登登！第一位幸運兒係貓頭鷹。呢位貓兄係一年前我突然興起整既，估唔到一年後佢連睡袋都有！

即晚想整多個比小花，點知就係咁跳針，車下縫下又車下縫下，搞左好耐先完成第二個。既然第二日會去婆婆屋企度假，一於拎埋布比婆婆車 (懶媽 mode 上身)。


婆婆兩三下就車左個睡袋比巧虎，不過佢覺得塊布太軟唔似睡袋，所以轉頭又搵過塊布車多個睡袋比巧虎。

TareBaby 見婆婆車得興起，就叫婆婆不如車多個比 18 號 bear bear (我地屋企既公仔好多都有名字)，仲要車到好似豬豬咁貼耳仔！(婆婆可能覺得今次真係玩大左) 結果呢，我說服左 TareBaby 婆婆會車個可以有幾個唔同用法既睡袋，可以遮晒塊面，遮淨個頭，同遮淨對眼既用法，好彩 TareBaby 都收貨，仲對婆婆既手藝發出讚嘆既聲音添！


而家每晚瞓覺，都會有兩位人兄穿埋睡袋，做 TareBaby 既陪瞓專員。